न्यूज अभियान
हरेक खबर विशेष खबर

काठमाडौं । राष्ट्रिय स्वतन्त्र पार्टी (रास्वपा) को पहिलो राष्ट्रिय महाधिवेशन अन्तर्गत बन्दसत्र सम्पन्न भएको छ। बन्दसत्रले विभिन्न सांगठनिक, विधान तथा निर्वाचन सम्बन्धी प्रस्तावहरूमा छलफल गरी आवश्यक निर्णयहरू पारित गरेपछि महाधिवेशन निर्वाचन समितिले संशोधित निर्वाचन कार्यतालिका सार्वजनिक गरेको छ।

महाधिवेशनको निर्धारित कार्यतालिकामा केही ढिलाइ भएपछि निर्वाचन प्रक्रियालाई व्यवस्थित बनाउन संशोधित तालिका जारी गरिएको हो। निर्वाचन समितिका अनुसार अब नयाँ कार्यतालिका अनुरूप उम्मेदवारी दर्ता, दाबी–विरोध, उम्मेदवारको अन्तिम नामावली प्रकाशन तथा मतदानका कार्यक्रम सञ्चालन हुनेछन्।

बन्दसत्रमा पार्टीको भावी नेतृत्व चयन, संगठन विस्तार, नीति तथा वैचारिक दिशाबारे व्यापक छलफल भएको बताइएको छ। पार्टीभित्र नेतृत्व चयनलाई लिएर विभिन्न समूह सक्रिय देखिए पनि महाधिवेशनलाई सहमतिमूलक र लोकतान्त्रिक ढंगले सम्पन्न गर्ने प्रयास जारी रहेको नेताहरूको भनाइ छ।

महाधिवेशनस्थल भरतपुरमा निर्वाचन गतिविधि तीव्र बनेसँगै नेतृत्वका आकांक्षीहरू मतदाता प्रतिनिधिमाझ समर्थन जुटाउन व्यस्त छन्। अध्यक्षदेखि केन्द्रीय सदस्यसम्मका पदका लागि प्रतिस्पर्धा हुने सम्भावना देखिएको छ।

रास्वपाको यो महाधिवेशनलाई पार्टी स्थापनापछिको सबैभन्दा महत्वपूर्ण आन्तरिक राजनीतिक अभ्यासका रूपमा हेरिएको छ। आगामी नेतृत्व चयनले पार्टीको भावी दिशा, संगठनात्मक संरचना र राष्ट्रिय राजनीतिमा उसको भूमिकालाई समेत प्रभाव पार्ने विश्लेषण भइरहेको छ।