न्यूज अभियान
हरेक खबर विशेष खबर

सिन्धुपाल्चोक । राष्ट्रिय स्वतन्त्र पार्टी (रास्वपा) ले सिन्धुपाल्चोकको चौतारा साँगाचोकगढी नगरपालिका वडा नम्बर १३ मा वडा समितिको कार्यालय उद्घाटन गरेको छ। स्थानीय तहमा पार्टीको संगठन विस्तार गर्ने, नागरिकसँगको सम्बन्ध सुदृढ बनाउने तथा जनताका समस्या र गुनासालाई सम्बोधन गर्ने उद्देश्यले वडा कार्यालय सञ्चालनमा ल्याइएको हो।

बुधबार आयोजित कार्यालय उद्घाटन कार्यक्रमका प्रमुख अतिथि विमल घगरीले घण्टी बजाएर वडा समितिको कार्यालय उद्घाटन गर्नुभएको थियो। कार्यक्रमको सभापतित्व रास्वपा चौतारा साँगाचोकगढी नगरपालिका–१३ का वडा सभापति महेश चौलागाईंले गर्नुभएको थियो।

कार्यक्रममा क्षेत्र नम्बर १ का क्षेत्रीय संयोजक उत्तम ठकुरी, चौतारा साँगाचोकगढी नगर सभापति विजय नेपाल, जिल्ला प्रतिनिधि संसार श्रेष्ठ, ज्ञानी बस्नेत, नगरपालिकाका  RAT विभाग संयोजक कुमार श्रेष्ठ, वडा नम्बर ७ का सभापति महेश धिताल, वडा नम्बर ११ का सभापति राजनराज गिरी तथा वडा नम्बर १२ का सभापति विनोद गिरीलगायतको विशेष उपस्थिति रहेको थियो। कार्यक्रममा विभिन्न वडाका प्रतिनिधि, स्थानीय बासिन्दा, समाजसेवी तथा पार्टीप्रति आस्था राख्ने व्यक्तिहरूको सहभागिता रहेको थियो।

अरूलाई गाली होइन, जनताको मन जित्ने राजनीति गर्नुपर्नेमा जोड

कार्यक्रममा बोल्ने वक्ताहरूले राजनीतिक दलहरूले एकअर्कालाई गालीगलौज गर्ने प्रवृत्तिभन्दा माथि उठेर जनताको हितमा काम गर्नुपर्नेमा जोड दिएका थिए। उनीहरूले रास्वपालाई सबैले मन पराउने, सबैको भरोसा जित्ने र जनताको प्यारो पार्टीका रूपमा स्थापित गर्न सकारात्मक सोच, व्यवहार र कामलाई प्राथमिकता दिनुपर्ने धारणा व्यक्त गरेका थिए।

वक्ताहरूका अनुसार राजनीतिको मुख्य उद्देश्य अरू पार्टीको आलोचना गरेर आफूलाई स्थापित गर्नु मात्र नभई जनताका समस्या बुझ्नु, तिनको समाधानका लागि पहल गर्नु र नागरिकको विश्वास जित्नु हो। त्यसैले रास्वपाका नेता तथा कार्यकर्ताले व्यक्तिगत आरोप–प्रत्यारोप र अनावश्यक विवादमा समय खर्चिनुभन्दा जनताको सेवामा केन्द्रित हुनुपर्ने उनीहरूको भनाइ थियो।

स्थानीय नागरिकका आवश्यकता र गुनासालाई प्राथमिकतामा राख्दै पारदर्शी, जिम्मेवार र परिणाममुखी ढंगले काम गर्न सके मात्रै पार्टीप्रति जनताको विश्वास बढ्ने वक्ताहरूले बताएका थिए। उनीहरूले पार्टीभित्र एकता, सहकार्य र सकारात्मक राजनीतिक संस्कारलाई बलियो बनाउँदै जनताले अनुभूति गर्न सक्ने परिवर्तनका लागि सक्रिय हुनुपर्नेमा समेत जोड दिएका थिए। कार्यक्रम सचिवले सञ्चालन गर्नु भएके थियो भने स्वागत मन्तव्य टंक पाण्डेले गर्नु भएके थियो ।

नागरिक र पार्टीबीच संवादको साझा थलो बन्ने अपेक्षा

वडा समितिको कार्यालय सञ्चालनमा आएसँगै स्थानीय नागरिकले आफ्ना समस्या, आवश्यकता, सुझाव तथा गुनासाहरू पार्टीसमक्ष प्रत्यक्ष रूपमा राख्न सक्ने अपेक्षा गरिएको छ। कार्यालयलाई केवल पार्टीका सांगठनिक गतिविधि सञ्चालन गर्ने स्थानका रूपमा मात्र नभई जनताको आवाज सुन्ने र स्थानीय सरोकारका विषयमा छलफल गर्ने साझा थलोका रूपमा विकास गर्ने लक्ष्य राखिएको छ।

स्थानीय तहमा जनतासँग प्रत्यक्ष सम्पर्कमा रहेर काम गर्न वडा समितिको भूमिका महत्वपूर्ण मानिन्छ। नागरिकका दैनिक समस्या पहिचान गर्ने, सम्बन्धित निकायको ध्यानाकर्षण गराउने तथा विकास निर्माण र जनजीविकासँग जोडिएका विषयमा पहल गर्ने काममा वडा कार्यालय प्रभावकारी माध्यम बन्न सक्ने विश्वास गरिएको छ। 

चौतारा साँगाचोकगढी नगरपालिका–१३ मा वडा कार्यालय उद्घाटन भएसँगै रास्वपाको स्थानीय सांगठनिक गतिविधिले थप गति लिने अपेक्षा गरिएको छ। कार्यक्रममा व्यक्त विचारअनुसार पार्टीको वास्तविक सफलता कार्यालय स्थापना र संगठन विस्तारमा मात्र सीमित नभई जनताको विश्वास जित्ने, जनसरोकारका विषयमा जिम्मेवार भूमिका निर्वाह गर्ने र सकारात्मक राजनीतिक संस्कार स्थापित गर्न सक्ने क्षमतामा निर्भर रहनेछ।

समग्रमा, वडा कार्यालय उद्घाटनले रास्वपालाई स्थानीय तहमा संगठन विस्तारसँगै जनतासँग नजिक रहेर काम गर्ने अवसर प्रदान गरेको छ। अब पार्टीले ‘अरूलाई गाली होइन, जनताको मन जित्ने काम’ लाई व्यवहारमा उतार्न सके मात्रै नागरिकको भरोसा जित्ने र सबैको साझा पार्टी बन्ने लक्ष्यतर्फ अघि बढ्न सक्ने देखिन्छ।