न्यूज अभियान
हरेक खबर विशेष खबर

काठमाडौं :  पूर्वराजा ज्ञानेन्द्र शाहले विजयादशमी २०८३ को अवसरमा शुभकामना सन्देश जारी गर्दै बाढीपहिरोबाट प्रभावित नागरिकको शीघ्र पुनःस्थापना र क्षतिग्रस्त भौतिक संरचनाको पुनर्निर्माणलाई प्राथमिकतामा राख्नुपर्ने बताएका छन्।

शुक्रबार निर्मल निवासस्थित संवाद सचिवालयमार्फत जारी शुभकामना सन्देशमा उनले यस वर्षको वर्षायाममा भोटेकोशी र बूढीगण्डकीमा आएको बाढी तथा अविरल वर्षाका कारण विभिन्न जिल्लामा ठूलो जनधनको क्षति भएको उल्लेख गरेका छन्। प्राकृतिक विपत्तिको दुःख र पीडाबीच पनि नेपालीले आफ्ना चाडपर्व, धर्म, संस्कृति तथा रीतिरिवाजलाई निरन्तरता दिनुपरेको उनले बताएका छन्।

प्राकृतिक विपत्तिबाट हुने क्षति न्यूनीकरण गर्न पूर्वतयारी र सावधानी आवश्यक रहेको उल्लेख गर्दै पूर्वराजा शाहले प्रकृतिको सन्तुलन र संरक्षणमा ध्यान दिनुपर्ने बताएका छन्। उनले विपत्तिबाट उत्पन्न दुःख र पीडालाई कम गर्न सबैले सही शक्ति र सद्बुद्धिको प्रयोग गर्नुपर्नेमा जोड दिएका छन्।

‘शोकलाई शक्तिमा र निराशालाई आशामा बदल्दै जीवनको यात्रा तय गर्नु पर्ने हाम्रो बाध्यता रहेको’ सन्देशमा उल्लेख छ। जनताको पीडा नै सिंगो देश र राज्यको साझा पीडा भएको मान्यताका आधारमा आगामी दिनमा पनि नेपाल र नेपालीको पक्षमा आफ्नो भूमिका रहने उनले बताएका छन्।

पुनर्निर्माणमा राष्ट्रिय स्वाभिमानको ख्याल गर्नुपर्ने
पूर्वराजा शाहले बाढीपहिरोबाट क्षतिग्रस्त भौतिक संरचनाको पुनर्निर्माण र पीडित नागरिकको शीघ्र पुनःस्थापनालाई अहिलेको प्रमुख आवश्यकता बताएका छन्। तर, यस्ता कार्यमा बाह्य सहयोग लिँदा देशको स्वाभिमान र स्थानीय परम्पराको संरक्षण हुने गरी कूटनीतिक चातुर्य अपनाउनुपर्ने उनको भनाइ छ।

नेपाल भूगोल मात्र नभई साझा इतिहास, आस्था, संस्कृति, परम्परा र पहिचानको प्रतीक भएको उल्लेख गर्दै उनले देश कठिन अवस्थामा रहेका बेला आपसी भाइचारा कायम राख्नुपर्ने बताएका छन्। एक क्षेत्रका नागरिकको पीडामा अर्को क्षेत्रका नागरिकले साथ दिनु र राष्ट्रिय हितलाई व्यक्तिगत स्वार्थभन्दा माथि राख्नु नै साँचो देशभक्ति भएको सन्देशमा उल्लेख छ।

राजनीतिक र संवैधानिक क्षेत्रको अन्योलप्रति चिन्ता
पूर्वराजा शाहले मुलुकको वर्तमान राजनीतिक, संवैधानिक, न्यायिक, आर्थिक, सामाजिक, प्रशासनिक तथा व्यावसायिक क्षेत्र अन्योल र अलमलमा देखिएको भन्दै चिन्ता व्यक्त गरेका छन्।

राज्य प्रणालीलाई कसरी अगाडि बढाउने, प्रजातान्त्रिक आधारलाई कसरी बलियो बनाउने र अर्थतन्त्रलाई कसरी उकास्ने भन्ने प्रश्न अहिले महत्त्वपूर्ण बनेको उनले बताएका छन्। विद्यमान अवस्थालाई सुधार गर्दै प्रजातान्त्रिक विधि र प्रक्रियालाई सुदृढ बनाउनुपर्ने तथा बदलिँदो विश्व परिवेश र भूराजनीतिक परिस्थितिमा राष्ट्रियता र मौलिक मूल्यलाई दृढ बनाउनुपर्ने उनको भनाइ छ।

राज्य सञ्चालनमा अघि बढेको नयाँ पुस्ताले देशवासीको मुहारमा खुसी ल्याउने अपेक्षा पनि उनले व्यक्त गरेका छन्।

एकताबद्ध र आत्मनिर्भर नेपाल निर्माण गर्न आह्वान
विजयादशमीको शुभकामना दिँदै पूर्वराजा शाहले नेपालीको मनमा करुणा, समाजमा सद्भाव र देशभक्तिको भावना अझ बलियो हुँदै जाओस् भन्ने कामना गरेका छन्। उनले विभाजित नभई एकताबद्ध, परनिर्भर नभई आत्मनिर्भर तथा कमजोर नभई सबल र सक्षम नेपाल निर्माण गर्ने सोच सबैमा जागृत हुनुपर्ने बताएका छन्।

असत्यमाथि सत्य र आसुरी शक्तिमाथि दैवी शक्तिको विजयको प्रतीकका रूपमा मनाइने बडादशैंका अवसरमा श्री नवदुर्गा भवानीले सबैलाई सत्य, न्याय र शक्तिको मार्गमा हिँड्ने सद्बुद्धि प्रदान गरून् भन्दै उनले शुभकामना व्यक्त गरेका छन्।

पूर्वराजा ज्ञानेन्द्र शाहले ‘जय नेपाल’ भन्दै जारी गरेको सन्देशको अन्त्यमा राष्ट्रिय एकता, सद्भाव, आत्मनिर्भरता र विपत्तिमा परेका नागरिकप्रतिको सहयोगलाई विशेष महत्त्व दिएका छन्।