न्यूज अभियान
हरेक खबर विशेष खबर

सर्लाही, १८ असोजः सर्लाहीको बागमतीस्थित बरम बाबा सामुदायिक वन क्षेत्रमा जङ्गली हात्ती मृत फेला परेको छ ।  

बागमती नगरपालिका–४, बरम बाबा सामुदायिक वन नजिकै आज परबर खेतमा जङ्गली हात्ती मृत फेला परेको हो । बिहान खेतमा परबर टिप्न पुगेका खेत धनीले हात्ती मरेको देखेपछि प्रहरीलाई खबर गरेका थिए । 

यस क्षेत्रमा मध्यराति हात्ती कराएको आवाज समेत सुनिएको सोही स्थानका कृष्ण लामाले जानकारी दिनुभयो ।  राति जङ्गलमा हात्ती कराएको सुनिएको थियो ।

उहाँले भन्नुभयो, “यहाँ हरेक वर्ष धान, मकैखेतीको सिजनमा चितवन र पर्सा निकुञ्जबाट हात्तीको बथान आउने गरेको छ । गए राति पनि त्यही होला भन्ने लाग्यो । वास्ता गरिएन । बिहान त हात्ती मृत फेला प¥यो । हामीले प्रहरी र वन कार्यालयलाई खबर गरेका थियौँ ।”  

अन्दाजी ३० देखि ३५ वर्षको वयस्क पोथी हात्ती मरेको सवडिभिजन वन कार्यालय मुर्तियाका प्रमुख सुवास योगीले बताउनुभयो । हात्ती मर्नुको कारण खुल्न नसकेको उहाँले बताउनुभयो ।

घटनाको मुचुल्का तयारी गरी हात्तीको सद्गत गरिने सवडिभिजन मुर्तियाका प्रमुख योगीको भनाइ छ । सो वडाका कार्यवाहक वडाध्यक्ष अर्थमान सिङ्ताका अनुसार उक्त क्षेत्रमा बेलाबेला चितवन राष्ट्रिय निकुञ्ज र पर्सा वन्यजन्तु आरक्षणबाट ठूलो सङ्ख्यामा हात्तीको बथान आउने गरेको छ ।