न्यूज अभियान
हरेक खबर विशेष खबर

काठमाडौं, १५ असोज ।  प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङदेम्बेले स्पष्ट बहुमत प्राप्त वर्तमान सरकारको कार्यशैलीप्रति असन्तुष्टि व्यक्त गरेका छन्।

उनले जनताले खोजेको बलियो सरकारबाट प्रभावकारी शासन र परिणाममुखी काम हुनुपर्नेमा सरकारको पछिल्लो कार्यशैलीले त्यसको अनुभूति गराउन नसकेको टिप्पणी गरेका छन्।

बिहीबार बसेको प्रतिनिधिसभाको बैठकमा विशेष समय लिएर बोल्दै नेता आङदेम्बेले सरकारको कार्यकुशलतामाथि प्रश्न उठाएका हुन्। उनका अनुसार जनताले परिवर्तन, स्थिरता, सुशासन र समृद्धिका लागि दिएको जनादेशलाई सरकारले अपेक्षाअनुसार सदुपयोग गर्न सकेको छैन।

आङदेम्बेले पाँच वर्षका लागि स्पष्ट बहुमत प्राप्त सरकारले मुलुकलाई स्थिरता र समृद्धिको दिशामा अघि बढाउनुपर्नेमा ‘झिना–मसिना’ विषयमा अल्झिएको आरोप लगाए।

उनले सरकारको पछिल्लो छ महिनाको कार्यसम्पादनलाई संक्रमणकालीन अवस्थाको निरन्तरताका रूपमा चित्रण गर्दै यसबाट विकास र अग्रगमनको अपेक्षा प्रभावित हुनसक्ने बताए।

‘हामीले परिवर्तन र सुशासन खोजेका हौँ, तर अहिलेको सरकारको क्रियाकलापबाट शासन कुनै निश्चित विधि र सिद्धान्तबाट निर्देशित नभई नेतृत्वको इच्छा र लहडमा चलेको आभास हुन्छ,’ उनले भने।

उनले सरकार सञ्चालनमा संस्थागत विधि, स्थापित परम्परा र प्रक्रियाको पालना हुनुपर्नेमा त्यसमा कमजोरी देखिएको जिकिर गरे। राजकीय व्यवहारमा देखिएको असन्तुलन तथा अनुभवहीनताका कारण सरकारको कार्यशैलीप्रति प्रश्न उठेको उनको भनाइ थियो।

प्रतिपक्षका तर्फबाट सरकारलाई आफ्नो कार्यशैलीको समीक्षा गर्न आग्रह गर्दै आङदेम्बेले जनताको दैनिक जीवनसँग प्रत्यक्ष जोडिएका विषयलाई प्राथमिकतामा राखेर काम गर्नुपर्ने बताए।

उनका अनुसार बहुमत प्राप्त सरकारसँग नीति तथा कार्यक्रम कार्यान्वयन गर्ने पर्याप्त राजनीतिक आधार रहेकाले त्यसलाई परिणाममा रूपान्तरण गर्ने जिम्मेवारी पनि सरकारकै हो।

उनले रोजगारी सिर्जना, आर्थिक गतिविधिको विस्तार, सार्वजनिक सेवा प्रवाहमा सुधार तथा विकास निर्माणका कामलाई गति दिन सरकार गम्भीर हुनुपर्ने धारणा राखे।

नागरिकले राजनीतिक परिवर्तनसँगै व्यवहारमा परिवर्तन र सेवा प्रवाहमा सुधार खोजेको उल्लेख गर्दै उनले जनअपेक्षा सम्बोधन गर्न सरकारलाई आग्रह गरे।

आङदेम्बेले सरकारको आलोचना गर्नु प्रतिपक्षको मात्र राजनीतिक दायित्व नभएको भन्दै सरकार स्वयंले आफ्ना निर्णय, प्राथमिकता र कार्यसम्पादनको नियमित समीक्षा गर्नुपर्ने बताए। जनताबाट प्राप्त जनादेशलाई सरकार सञ्चालनको आधार बनाउँदै मुलुकको दीर्घकालीन हितमा निर्णय लिनुपर्ने उनको भनाइ थियो।

उनले वर्तमान अवस्थामा राजनीतिक स्थिरताको अवसरलाई विकास र सुशासनमा उपयोग गर्नुपर्नेमा जोड दिए। सरकारका निर्णय र गतिविधिले राज्यका संस्थाप्रति जनविश्वास बढाउने वा घटाउने भएकाले शासन सञ्चालनमा संवेदनशीलता र जिम्मेवारी आवश्यक रहेको उनले बताए।

प्रतिनिधिसभाको बैठकमा प्रमुख प्रतिपक्षका संसदीय दलका नेताले सरकारको कार्यशैलीमाथि प्रश्न उठाएसँगै सरकारको कार्यसम्पादन, संस्थागत प्रक्रिया र जनअपेक्षा सम्बोधनको विषय फेरि संसद्मा बहसको विषय बनेको छ। आङदेम्बेको टिप्पणीले सरकार र प्रतिपक्षबीच नीति तथा शासन सञ्चालनका विषयमा आगामी दिनमा थप बहस हुने संकेतसमेत गरेको छ।